Академиялык дресс-код маселелерине арналган куратордук саат

Филология институтунун орус филологиясы кафедрасында РЯЛ-1-22 тайпасында университеттеги академиялык дресс-кодду сактоо маселелерине арналган куратордук саат өткөрүлдү. Иш-чараны кафедранын улуу окутуучусу Сулейманова Т.А. жүргүздү.

Жолугушуунун жүрүшүндө билим берүү чөйрөсүндө студенттердин сырткы келбетине коюлган талаптар талкууланды. Сулейманова Т.А. тыкан жана жөнөкөй кийим стили жогорку окуу жайда ишкердик жана тартип атмосферасын түзүүгө өбөлгө болорун, ошондой эле окуу процессине, окутуучуларга жана курсташтарга болгон урмат-сыйды көрсөтөрүн белгиледи.

Ошондой эле жаз мезгилинин келиши менен айрым студенттер күнүмдүк жана расмий эмес кийимдерди, анын ичинде жыртылган джинсы шымдарды, өтө ачык же ашыкча жаркыраган кийим элементтерин кийе баштаары белгиленип, мындай кийимдер университеттин дресс-код талаптарына дайыма эле туура келе бербестиги айтылды. Ушуга байланыштуу студенттерге жогорку окуу жайдын студентинин макамына ылайык, тыкан жана токтоо кийим стилин сактоо сунушталды.

Түшүндүрмө берүү менен кафедра башчысы Жусупова А.А. да сөз сүйлөдү. Ал дресс-код талаптарын сактоо академиялык маданияттын маанилүү бөлүгү экенин жана студенттерде жоопкерчилик, тартип жана кесиптик этиканы калыптандырууга жардам берерин белгиледи.

Куратордук сааттын алкагында студенттер университеттин сырткы келбетке коюлган негизги талаптары боюнча маалымат алышып, актуалдуу маселелерди талкуулап, өз пикирлерин билдиришти.

Өткөрүлгөн жолугушуу студенттер арасында жүрүм-турум маданиятын калыптандырууга жана университеттин ички тартип эрежелерин сактоонун маанилүүлүгүн түшүнүүгө багытталды.