Филология институтунда Бүткүл дүйнөлүк СПИДге каршы күрөшүү күнү белгиленди

Жаштар комитети филология факультетинин 1-курстары үчүн «Жаштар СПИДге каршы» аттуу маалыматтык–агартуу акциясын уюштурду. Иш-чаранын максаты студенттердин ден соолук маданиятын калыптандыруу, ВИЧ/СПИД тууралуу маалымдуулугун жогорулатуу, жугуу жолдору жана алдын алуу чаралары жөнүндө кеңири түшүндүрмө берүү, ошондой эле жаштардын социалдык активдүүлүгүн арттырууга багытталды.

Бул иш-чарага РЯЛ-1-25 тайпасынын студенткалары өзгөчө салым кошушту. Алар атайын даярдалган мазмундуу презентациялар жана докладдар менен чыгып, ВИЧ/СПИДдин тарыхый аспектилери, бүгүнкү күндөгү жайылыш көрсөткүчтөрү, коркунуч факторлору, жугуу жолдору жана алдын алуу ыкмалары тууралуу кеңири маалымат беришти. Студенткалар өздөрүнүн баяндамаларында саламат жашоо образынын маанисин, коопсуздук эрежелерин сактоо зарылдыгын жана ооруну эрте аныктоонун актуалдуулугун өзгөчө белгилешти.

Презентациялар өзүнүн маалыматтуулугу, актуалдуулугу жана сапаттуу аткарылышы менен айырмаланды. Визуалдык материалдардын таасирдүүлүгү жана баяндамалардын так түзүлүшү маалыматтын жакшы кабыл алынышына өбөлгө түздү. РЯЛ-1-25 тайпасынын студенткаларынын активдүү катышуусу алардын темага болгон жоопкерчиликтүү мамилесин көрсөтүп, акциянын жалпы агартуу багытына маанилүү салым кошту.

Иш-чара кызыгуу жана жигердүү талкуу атмосферасында өттү. Катышуучулар суроолорду берип, пикир алмашып, ВИЧ/СПИДдин алдын алуу боюнча кошумча кеңештерди алышты. Акциянын жыйынтыгы көрсөткөндөй, мындай демилгелер жаштардын саламаттык маданиятын калыптандырууда, маалымдуулукту кеңейтүүдө жана социалдык жоопкерчиликти өнүктүрүүдө маанилүү ролду ойнойт.