Мектепте окуу-изилдөө иштерине багытталган семинар уюштурулду

2025-жылдын 14-ноябрында Манас шаарындагы №4 жалпы билим берүүчү орто мектебинде кыргыз тили жана адабияты кафедрасынын окутуучусу, ф.и.д., профессор И.Абдувалиев студент-практиканттар үчүн практиканын жумуш ордунда окутуу боюнча усулдук семинар өткөрдү.

Семинардын негизги максаты – келечек мугалимдерге мектепте окуучулар менен изилдөө иштерин жүргүзүүнүн ыкмаларын үйрөтүү, маалыматтарды топтоо жана жыйынтык чыгаруу методикасын көрсөтүү болду.

Семинардын негизги багыттары:

• Студенттерге практикалык-методикалык көндүмдөрдү берүү;
• Кыргыз тили жана адабияты сабагында окуучулар менен изилдөө иштерин пландаштырууну үйрөтүү;
• Мини-изилдөөлөрдү уюштуруу жана маалыматтарды топтоо, иштеп чыгуу ыкмаларын көрсөтүү;
• Практиканттардын илимий-изилдөө маданиятын калыптандыруу.

Семинар учурунда студенттер практикалык тапшырмаларды аткарып, методикалык суроолорун беришти. Профессор ар бир тапшырма боюнча пикир берип, тажрыйба алмашууга шарт түздү.

Семинардын жыйынтыгында студенттер:

• Изилдөө иштерин уюштуруунун так методикасын өздөштүрүштү;
• Сабакка интеграцияланган изилдөө долбоорлорун өз алдынча пландаштыра алышты;
• Практикалык тажрыйбасын бекемдешти.

№4 жалпы билим берүүчү орто мектеп студент-практиканттар менен кызматташууну улантып, келечектеги мугалимдердин кесиптик тажрыйбасын жогорулатууга жана илимий-изилдөө маданиятын калыптандырууга салым кошууну улантат.