КЫЗЫЛ ЖООЛУК ЖАЛЖАЛЫМ 

Кыргыз тили жана адабияты кафедрасынын 1-курстары тарабынан кыргыз элинин залкар жазуучусу Ч. Айтматовдун туулган күнүнө карата “Кызыл жоолук жалжалым” аттуу иш-чара өткөрүлдү. Ага кафедранын башчысы И.Абдувалиев, улук окутуучулар А.Шерипбаев, У.Омурзакова жана студенттер катышышты. Иш-чаранын жүрүшүндө КТ-1-24 тайпасынын кымча бел кыздары бий өнөрүн көрсөтүшүп, көркөм окууларды окушуп, обон созушуп, жазуучунун чыгармаларынын негизинде бир нече үзүндүлөрдү аткарышты. Чыгарманын каармандарын китеп беттеринен кезиктирип жүргөн болсок, бул жолкусунда сахна аркылуу каармандар менен бетме-бет кезиктик. Алар, сүйүү баянындагы Жамийла менен Данияр, кызыл жоолукчан Асел менен айдоочу Илияс, колуна кызыл алма кармаган сүрөтчү жигит, окутам деп айыл аралаган Дүйшөн, анын окуучусу Алтынай, бала деп жүрөгү сыздаган Толгонай, согуш качкыны Ысмайыл жана аялы Сейде. Бул көрүнүштөр аркылуу жазуучунун өз чыгармаларында түзгөн миң сырлуу ааламы ар бирибиздин жан дүйнөбүздө ушул мезгилге чейин өчпөй жашап келе жатканына дагы бир ирет ишендик.

Ошентип, биз чебер калемгер жараткан ошол түркүн түстүү ааламдын түрдүү кырларын окуп-үйрөнүп келе жатабыз, андан өмүр бою турмуштук сабак ала беребиз деген тилек-максат менен иш-чарабызды жыйынтыктадык.