Магистранттардын жол картасы талкууланды

Б.Осмонов атындагы Жалал-Абад мамлекеттик университетинин карьераны өнүктүрүү жана өндүрүштүк практиканы уюштуруу бөлүмү тарабынан магистердик программалардын жетекчилери менен практика жетекчилеринин катышуусунда семинар уюштурулуп, 2024-жылдын 25-декабрында өткөрүлдү.

Семинарда практиканын жүрүшү боюнча магистранттардын жол карталарынын маанилүү аспектилери талкууланды. Семинардын катышуучулары башкаруу, илимий-педагогикалык жана илимий-изилдөөчүлүк практикалардын жүрүшүндө ишмердүүлүктөрдү ишке ашыруу үчүн магистранттарга колдоо көрсөтүү маанилүүлүгүнө өзгөчө басым жасашты.

Э.Уметов атындагы педагогикалык факультеттин математика жана математикалык моделдештирүү кафедрасынын улук окутуучусу М.Н.Нурматова КӨ жана ӨПУ бөлүмүнүн тапшырмасы менен жол картасын жана магистранттын күндөлүгүн түзүп келгендигин айтып, тааныштырып, мазмунун мүнөздөп, жол картасы практика мезгилинде магистранттын ишмердүүлүгүн уюштурууну кыйла жеңилдете тургандыгын белгиледи.

Семинардын катышуучулары жол картасынын ар бир пунктун жана магистранттын күндөлүгүн кызуу талкуулашты. Магистердик программа жетекчилери жана практика жетекчилери тарабынан магистранттар үчүн ыңгайлуу жана жеткиликтүү болгон, практиканын бардык түрлөрү үчүн жол картасын камтыган бирдиктүү күндөлүк түзүү сунушталды.