Көз карашыбызды кеңейтебиз: дизайн, композиция жана материал таануу боюнча конок лекциялар цикли.

Ош шаарынан ОшМУнун модельер-конструктор адистигинин окутуучулары жана студенттери менен  келген делегациянын визитинин алкагында биздин окуу жайдын студенттери үчүн үч багыттуу конок лекциялары уюштурулду. Чакырылган адистер жана окутуучулар көркөм эскизден баштап кездеменин физикалык түзүлүшүнө чейинки негизги темаларды чагылдырып беришти.

№1 Лекция. Эскизден конструкцияга чейин

- Лектор: Батырова Зарифа Момуновна

- Тема: Дизайнердик эскиз боюнча кийимдин моделдерин композициясы жана конструкциясы

- Максаттуу аудитория: 2 жана 3-курс

- Дисциплина: Тигүү буюмдарын моделдөө жана конструирлөө (ТБМК)

- Кыскача: Зарифа Момуновна студенттерге дизайнердик эскизди кантип туура "окууну" жана автордук ойду жоготпостон чиймеге (лекалага) сабаттуу которууну түшүндүрүп берди. Пропорцияга, буюмдун балансына жана техникалык моделдөөгө өзгөчө көңүл бурулду.

№2 Лекция. Костюмдун анатомиясы

- Лектор: Абдырайым кызы Жанара

- Тема: Костюмдун структурасы

- Максаттуу аудитория: 2-курс

- Дисциплина: Костюмдун композициясы / Костюмдун тарыхы

- Кыскача: Лекция костюмду татаал система катары талдоого арналды: ички каркастан жана силуэт формаларынан баштап декоративдик элементтерге чейин. Студентер конструкциялык алкактардын, жеңдердин жана жакалардын эволюциясы, ошондой эле костюмдун түзүлүшү адамдын фигурасын кабыл алууга кандай таасир тийгизери тууралуу маалымат алышты.

№3 Лекция. Материал таануу: буладан кездемеге чейин

- Лектор: Калысбек кызы Айжамал

- Тема: Текстилдик булалар, кездеме жаралуу

- Максаттуу аудитория: 2-курс

- Дисциплина: Материал таануу жана тигүү буюмдарын конфекциялоо

- Кыскача: Бул лекцияда студенттер текстиль өндүрүшүнүн дүйнөсүнө сүңгүп киришти. Айжамал табигый жана химиялык булалардын айырмасын көрсөтүп, жип ийрүүдөн баштап кездеменин жасалгаланышына чейинки этаптарды түшүндүрдү. Бул билимдер келечектеги технологдорго белгилүү бир модель үчүн материалды туура тандоодо өтө зарыл.

Бардык лекторлорго баалуу билимдери жана тажрыйба бөлүшкөндүгү үчүн ыраазычылык билдиребиз!