Социалдык кызматкерлердин кесиптик өсүүсү: Теориядан практикага карай «Жол картасы»

Туруктуу өнүгүү боюнча БУУнун Глобалдык келишиминин алкагындагы «Сапаттуу билим берүү» принциптерине, окуу планына жана квалификация алдындагы практиканын программасына ылайык 2026-жылдын 6-апрелинен 2-майына чейинки мөөнөттө СРс-1-21 тайпасынын студенттери квалификация алдындагы практикасын башташты. Бул практика жөн гана окуу программасынын бир бөлүгү эмес, ал туруктуу жумуш жана экономикалык өсүүгө салым кошуучу социалдык институттарды бекемдөө милдетин көздөйт. Экономика жана укук Институтунун "профессор Ш. М. Ниязалиев атындагы Философия жана гуманитардык илимдер" кафедрасынын башчысы, доцент Р. К. Шамшиев студенттерди практикага жөнөтүүдө: "Социалдык кызматкердин иши – бул жөн гана тейлөө эмес, ал коомдун экономикалык туруктуулугунун жана адамдык капиталдын өнүгүүсүнүн негизги кыймылдаткыч күчү", – деп белгиледи.

Жоопкерчиликтүү кесиптик маданият. Практикалык окутуунун жүрүшүндө өзгөчө басым жоопкерчиликтүү керектөө жана өндүрүш принциптерине жасалды. Бул багытта студенттер төмөнкү багыттар боюнча тереңирээк маалымат алышты: Санариптик ресурстарды туура пайдалануу: Маалыматтык агымдарды көзөмөлдөөдө ресурстарды үнөмдүү жана максаттуу колдонуу. Документтештирүү маданияты: Бенефициарлар менен иштөөдө кагазсыз технологияларды колдонуу жана маалымат коопсуздугу.

Этикалык жоопкерчилик: Бенефициарлардын укуктарын коргоо жана конфиденциалдуулукту сактоо менен социалдык кызмат көрсөтүүнүн сапатын жогорулатуу.

Практика жетекчилери Ы. М. Кожоназарова, Н. С. Алдозова жана Н. А. Жолдошева студенттерге учурдагы социалдык мекемелердин санариптик мүмкүнчүлүктөрүн жана алардагы медиаборборлордун ролун кантип натыйжалуу пайдалануу керектиги боюнча практикалык нускамаларды беришти.

Бул практиканын жыйынтыгында, студенттер академиялык билимдерин практикалык тажрыйба менен айкалыштырып, коомдун социалдык-экономикалык туруктуулугун камсыз кылууга жөндөмдүү кесипкөй адистер катары калыптанышат.