Манас – элдин руху жана маданияты

Э.Уметов атындагы педагогикалык факультетинде 10-декабрь  Манас күнүнө карата БАС кафедрасы тарабынан уюштурулган кыргыз элинин руханий дөөлөтү, маданияты жана тарыхынын ажырагыс бөлүгү болгон Манас эпосун даңазалоо максатында факультеттик деңгээлде «Манас – элдин руху жана маданияты» аттуу таймаш өткөрүлдү. Бул иш-чара Манас күнүнө карата уюштурулуп, кафедралардын студенттерин бириктирген жогорку деңгээлдеги маданий-агартуучулук майрам болуп өттү.  

 Бул иш-чарага Э.Уметов атындагы педагогикалык факультетинин деканы, ф.и.д., профессор Токоева Г.С., башкаруунун автоматташтырылган системасы кафедрасынын башчысы, п.и.к., доцент Ажыкулов С.М., кыргыз тили жана адабияты кафедрасынын окутуучусу Кудайкулова Г.О., Э.Уметов атындагы ПФнын кафедра башчылары жана БАС кафедрасынын профессордук-окутуучулук курамы, студенттери катышты. Алгач таймашты факультеттин деканы жана БАС кафедрасынын башчысы ачып беришти. Бул жарышта ар бир кафедранын студенттери Манас айтуу боюнча таймашышты. Иш-чаранын негизги максаты – студенттердин Манас эпосуна болгон кызыгуусун арттыруу, анын терең маанисин жана руханий баалуулуктарын жаштар арасында жайылтуу болду. Мындан тышкары, таймаш студенттердин чыгармачылык жөндөмдөрүн өстүрүп, алардын кыргыз маданиятына болгон урмат-сыйын күчөттү.

Мыкты даярдыгы жана креативдүүлүгү менен айырмаланган студенттер уюштуруучулар тарабынан дипломдор менен сыйланышты. Иш-чаранын аягында Токоева Г.С жана Ажыкулов С.М. чыгып сүйлөп студенттердин андан ары окууларына жана алдыда келе жаткан кышкы сессияларына ийгиликтерди каалап сөзүн жыйынтыкташты.