Интервью: Иш берүүчүлөр менен тыгыз байланыш — келечекке жол

Интервьюнун максаты: Бул интервьюнун негизги максаты — студенттердин теориялык билимдерин практика менен айкалыштыруу мүмкүнчүлүктөрүн көрсөтүү, иш берүүчүлөрдүн талаптары менен таанышуу жана билим берүү мекемеси менен сот органдарынын ортосундагы кызматташууну чыңдоо болуп саналат.

Интервьюну алган: Экономика жана укук колледжинин өндүрүштүк практика жана карьера жетекчиси Н. Айылчиева жана  Укук таануу адистигинин практика жетекчиси Б. Жусупбекова .

— Саламатсызбы, Талгарбек Сапарбекович! Алгач өзүңүздү жана иш ордуңузду кыскача тааныштырып өтсөңүз. — Саламатсызбы! Мен Сузак райондук сотунун кеңсе бөлүмүнүн башчысы болуп эмгектенем. Биздин негизги милдет — сот иш кагаздарын так жана өз убагында жүргүзүү, жарандардын кайрылууларына ыкчам жооп берүү.

— Колледж студенттери менен кызматташуу сиздер үчүн канчалык маанилүү? — Бул абдан маанилүү. Студенттер теориялык билимди практика менен айкалыштырып, өз кесибин тереңирээк түшүнө башташат. Биз болсо келечектеги адистерди даярдоого салым кошобуз.

— Практика учурунда студенттер кайсы көндүмдөрдү көбүрөөк өздөштүрүшөт? — Алар документтер менен иштөө, тартипти сактоо, жоопкерчилик жана жарандар менен туура мамиле куруу сыяктуу маанилүү көндүмдөрдү үйрөнүшөт.

— Жаш адистерге кандай талаптарды коёт элеңиз? — Биринчиден, жоопкерчилик. Экинчиден, тактык жана сабырдуулук. Үчүнчүдөн, мыйзамдарды жакшы билүү жана өзүн өнүктүрүүгө умтулуу.

— Колледж менен соттун ортосундагы байланыш тууралуу эмне айтасыз? — Биздин кызматташтык туруктуу жана пайдалуу. Мындай байланыш билим берүүнүн сапатын жогорулатат жана студенттерге реалдуу иш чөйрөсүн көрсөтөт.

— Акырында студенттерге кандай кеңеш берет элеңиз? — Ар дайым үйрөнүүдөн тажабаңыздар. Практика — бул жөн гана милдет эмес, бул өз келечегиңиздерди куруунун башаты.

— Урматтуу Талгарбек Сапарбекович, маегиңиз үчүн чоң рахмат! Акыркы суроо: келечекте мындай кызматташуулар дагы уланабы?

— Албетте, мындан ары да колледж менен тыгыз иш алып барып, студенттерге практикалык жардам көрсөтүүгө дайыма даярбыз.

Интервью жыйынтыгында белгилүү болгондой, билим берүү мекемеси менен иш берүүчүлөрдүн ортосундагы тыгыз байланыш студенттердин кесиптик жактан калыптанышына чоң өбөлгө түзөт. Практика — бул жөн гана окуу процессинин бир бөлүгү эмес, ал келечектеги ийгиликтин негизин түзгөн маанилүү этап.