Заманбап окутуу ыкмалары: санариптик инструменттер боюнча мастер-класс

          2024-жылдын 26-декабрында Экономика жана укук колледжинде заманбап билим берүү тенденцияларына ылайык уюштурулган «Digital Teacher» аталышындагы мастер-класс өткөрүлдү. Иш-чараны Калмурзаева Асель Казыбековна алып барып, мугалимдер үчүн санариптик компетенцияларды өнүктүрүүгө багытталган практикалык тренинг өткөрдү.

       Мастер-класстын негизги максаты — окутуу процессинде санариптик инструменттерди натыйжалуу пайдаланууну үйрөтүү жана мугалимдердин кесиптик ишмердүүлүгүнө заманбап технологияларды интеграциялоо болду. Иш-чаранын жүрүшүндө катышуучулар билим берүүдө кеңири колдонулуп жаткан төмөнкү санариптик тиркемелер менен тааныштырылды: Gamma, Padlet, Diffit, myQuiz жана Grok.

          А. К. Калмурзаева ар бир инструменттин функционалдык мүмкүнчүлүктөрүн, практикалык колдонуу жолдорун жана сабактарды пландаштыруудагы артыкчылыктарын мисалдар аркылуу кеңири түшүндүрүп берди. Айрыкча интерактивдүү сабактарды түзүү, студенттердин активдүүлүгүн жогорулатуу жана окуу материалдарын визуалдаштыруу маселелерине өзгөчө көңүл бурулду.

       Мастер-класс практикалык форматта өтүп, катышуучулар ар бир тиркеме менен өз алдынча иштеп көрүүгө мүмкүнчүлүк алышты. Бул мугалимдерге санариптик инструменттерди дароо өз сабактарында колдонууга даярдык түздү.

Иш-чара мугалимдер тарабынан жогору бааланып, санариптик билим берүү багытындагы мындай тренингдердин актуалдуулугун дагы бир ирет тастыктады. «Digital Teacher» мастер-классы колледждеги билим берүү процессин заманбап талаптарга ылайык өркүндөтүүгө олуттуу салым кошту.