ЖАГУнун Медициналык институтунда чет өлкөлүк студенттердин эң чоң бүтүрүү кечеси өттү

27-июнда Б. Осмонов атындагы Жалал-Абад мамлекеттик университетинин (ЖАГУ) Медициналык институтунда чет өлкөлүк студенттер үчүн салтанаттуу бүтүрүү кечеси жогорку деңгээлде өткөрүлдү. Бул күн окуу жайдын тарыхында түбөлүккө калат: институт түзүлгөндөн берки эң ири көрсөткүч катталып, 700гө жакын жаш адис дипломдорго ээ болушту.

Салтанаттуу ачылыш жана Гиппократтын анты

Майрамдык иш-чара расмий бөлүк менен башталды. Бүтүрүүчүлөргө куттуктоо жана ак каалоо-тилек сөзү менен Медициналык институттун директору, химия илимдеринин кандидаты, доцент Сакбаева Зулфия Исаковна кайрылды. Ал жаш дарыгерлерди окууну ийгиликтүү аякташы менен куттуктап, алардын өжөрлүгүн, эмгекчилдигин белгиледи жана өз мекенинде гана эмес, дүйнө жүзүндө бул улуу кесипти аркалоодо чоң жетишкендиктерге жетишишин каалады.

Кеченин эң толкунданткан жана негизги учуру — Гиппократтын антын берүү аземи болду. Кесиптик медициналык коомчулукка кадам таштап жаткан кечээки студенттер өз устаттарынын жана кесиптештеринин алдында дарыгерлик милдетин ак ниеттен аткарууга жана өмүрүн адамзатка кызмат кылууга арноого салтанаттуу түрдө ант беришти.

Дипломдорду жана сыйлыктарды тапшыруу

Шаңдуу кол чабуулардын коштоосунда ЖАГУнун администрациясынын өкүлдөрү бүтүрүүчүлөргө көптөн күткөн жогорку медициналык билими тууралуу дипломдорун тапшырышты. Окууда гана эмес, университеттин коомдук, илимий жана спорттук жашоосунда өзгөчө айырмаланган мыкты студенттер атайын сыйлыктар жана Ардак грамоталар менен сыйланышты.

ЖАГУнун жетекчилиги өз бүтүрүүчүлөрү менен чын жүрөктөн сыймыктанарын билдирет жана биздин окуу жайдын дубалында алган билимдери алардын медициналык карьерасында бекем пайдубал болуп берерине терең ишенет.

Бүтүрүүчүлөрүбүздү чын дилибизден куттуктайбыз жана кесиптик келечегине ак жол каалайбыз!