Нооруз майрамында жаштардын өнөрү: Агрардык-техникалык институттун салымы

Жаздын жарчысы болгон 21-март — Нооруз майрамы ар бир жүрөккө жылуулук, ар бир үйгө кут алып келген өзгөчө күн. Бул улуу майрам Манас шаардык мэриясы тарабынан жогорку деңгээлде уюштурулуп, шаар тургундарына унутулгус маанай тартуулады.

Майрамдык иш-чарага ЖАМУнун Агрардык-техникалык институтунун студенттери да активдүү катышышып, өздөрүнүн чыгармачылык дараметин даңазалашты. Улуттук бийлердин коштоосунда сахна жанданып, ар бир кыймыл Нооруздун көркүн арттырды. Обондор жаңырып, шаңдуу ырлар көрүүчүлөрдүн көңүлүн көтөрүп, майрамдык маанайды күчөттү.

Мындан тышкары,  даярдалган сахналык көрүнүштөр элдик каада-салттарды чагылдырган терең мазмуну менен айырмаланды. Алар ынтымакты, биримдикти жана улуттук баалуулуктарды даңазалап, көрүүчүлөргө таасирдүү тажрыйба тартуулашты.

Бул майрам — табияттын гана эмес, адамдардын да жаңылануусунун символу. Манас шаарында өткөн бул салтанат биримдикти бекемдеп, элдин жүрөгүнө үмүт жана кубаныч тартуулады.

Нооруз майрамы кут болсун! Ар бир үйгө береке, ар бир адамга бакыт-таалай алып келсин!