"Өзгөчө кырдаалдардан коргонуу" аталышындагы иш-чара.

9-февраль күнү Агрардык-техникалык институтунда «Техносфералык коопсуздук» адистигинде билим алып жаткан студенттердин демилгеси менен маанилүү жана пайдалуу иш-чара уюштурулду. Бул иш-чара Жалал-Абад мамлекеттик университетинин 6-корпусунда окуган студенттерге жана профессордук-окутуучулук курамга багытталып, өзгөчө кырдаалдарда коопсуздукту сактоо, туура аракеттенүү жана коргонуу жолдору боюнча түшүндүрүү иштерин жүргүзүү максатын көздөдү.

Иш-чаранын жүрүшүндө студенттерге жана окутуучуларга табигый жана техногендик мүнөздөгү өзгөчө кырдаалдардын түрлөрү, алардын пайда болуу себептери жана мүмкүн болгон кесепеттери тууралуу кеңири маалымат берилди. Ошондой эле жер титирөө, өрт кырсыгы, сел, көчкү жана башка кооптуу жагдайларда адамдардын өмүрүн сактап калуу үчүн кандай аракеттерди жасоо керектиги практикалык мисалдар аркылуу түшүндүрүлдү. Катышуучулар коопсуз эвакуация жолдору, биринчи медициналык жардам көрсөтүүнүн негизги ыкмалары жана коргонуу каражаттарын туура колдонуу тууралуу пайдалуу маалыматтарды алышты.

Аталган иш-чарага Кыргыз Республикасынын Өзгөчө кырдаалдар министрлигинин Манас шаардык бөлүмүнүн кызматкерлери активдүү катышып, өздөрүнүн кесиптик тажрыйбасына таянып, практикалык көрсөтмөлөрдү беришти. Алар өзгөчө кырдаалдар учурунда адамдардын психологиялык даярдыгынын маанилүүлүгүн белгилеп, коркунуч жаралган учурда сабырдуулукту сактоо жана туура чечим кабыл алуу адам өмүрүн сактап калууда негизги ролду ойной тургандыгын белгилешти.

Бул иш-чара студенттердин теориялык билимин бекемдеп гана тим болбостон, өзгөчө кырдаалдарга даярдык деңгээлин жогорулатууга чоң салым кошту. Мындай практикалык жолугушуулар жаштардын коопсуздук маданиятын калыптандырууга, өз өмүрүнө жана айлана-чөйрөдөгү адамдардын коопсуздугуна жоопкерчилик менен мамиле кылуусуна өбөлгө түзөт. Иш-чаранын жыйынтыгында катышуучулар уюштуруучуларга ыраазычылык билдирип, келечекте да ушундай пайдалуу сабактарды өткөрүп туруунун маанилүүлүгүн белгилешти.