“Кургак учукту жеңебиз!” 

      Б.Осмонов атындагы Жалал-Абад мамлекеттик университетин медициналык пунктунун кызматкерлери жана Жалал-Абад облусттук кургак учукка каршы күрөшүү борбору менен биргеликте Кыргыз Республикасынын “Коомдук саламаттык сактоо жөнүндө” Мыйзамынын негизинде, 24-март Бүткүл дүйнөлүк кургак учукка каршы күрөшүү күнүнө карата Манас  шаарынын мэриясынын буйругунун негизинде “Кургак учукту жеңебиз!” аталышындагы окутуучулук  курам жана студенттерге семинар өткөрүлдү.

     Иш-чаранын максаты –университеттин туруктуу өнүгүүнүн принциптерине ылайык, жакшы ден соолук жана бакубатчылык бөлүгүндөгү адамдардын бул оорунун себептери, жугуу жолдору, белгилери жана алдын алуу чаралары тууралуу маалыматты таратуу болуп саналат.

 Кургак учук — жугуштуу оору, ал көбүнчө өпкөнү жабыркатат жана аба аркылуу жугат. Иш-чаранын жүрүшүндө төмөнкү маселелер каралды:

• Оорунун белгилери (узакка созулган жөтөл, дене табынын көтөрүлүшү, алсыроо)
• Жугуу жолдору жана коркунуч факторлору
• Алдын алуу (вакцинация, туура тамактануу, иммунитетти бекемдөө)
• Өз убагында текшерилүүнүн мааниси
• Дарылоо ыкмалары жана айыгуу мүмкүнчүлүгү

Мындай иш-чаралар коомдо кургак учукка каршы күрөшүүнүн маанилүү бөлүгү болуп саналат. Бүгүнкү күндө адамзаттын ден соолугуна коркунуч жараткан оорулардын бири — кургак учук оорусу болуп саналат. Кургак учук — бул жугуштуу оору болуп, ал негизинен өпкөнү жабыркатат. Ооруну козгогуч бактериялар аба аркылуу, тактап айтканда жөтөлгөндө, чүчкүргөндө жана сүйлөгөндө бир адамдан экинчи адамга жугат.

Кургак учуктун негизги белгилерине узак убакытка созулган жөтөл, көкүрөктүн оорушу, дене табынын көтөрүлүшү, түнкүсүн тердөө, алсыроо жана табиттин жоголушу кирет. Эгерде бул белгилер байкалса, дароо дарыгерге кайрылуу зарыл. Бул оорунун алдын алуу үчүн бир нече маанилүү эрежелерди сактоо керек. Биринчиден, өз убагында медициналык текшерүүдөн өтүп туруу зарыл. Экинчиден, жеке гигиенаны сактоо жана туура тамактануу аркылуу иммунитетти бекемдөө маанилүү. Ошондой эле, эмдөө (вакцинация) да кургак учуктан коргонууга жардам берет. Кургак учук дарыланчу оору экенин белгилей кетүү керек. Эгерде бейтап дарыланууну үзгүлтүксүз алып барса, толук айыгууга мүмкүнчүлүк бар. Бирок дарылоону жарым жолдо токтотуу оорунун күчөшүнө жана башкаларга жугушуна алып келет.

Жыйынтыктап айтканда, кургак учукка каршы күрөшүү ар бирибиздин жоопкерчилигибиз. Өз ден соолугубузга кайдыгер карабай, убагында текшерилип, дарыгерлердин кеңешин аткаруу аркылуу бул оорунун жайылышын алдын ала алабыз.