Билим берүү Олимпиндеги жеңиш: EdNet ЖАМУну өлкөнүн мыкты 10 ЖОЖунун катарына киргизди

Бүгүн Б. Осмонов атындагы Жалал-Абад мамлекеттик университетине Билим берүү сапатын кепилдөө боюнча «EdNet» коомдук фондунун президенти О.А. Уманкулова иш сапары менен келди. Жолугушуунун жүрүшүндө ректор К.Ж. Усенов менен 2025–2026-жылдар үчүн Кыргыз Республикасынын жогорку окуу жайларынын II көз карандысыз рейтингинин жыйынтыктары талкууланып, ЖАМУ кесиптик рейтингдин жыйынтыгы боюнча өлкөнүн мыкты он ЖОЖунун катарына киргенин тастыктаган сертификат тапшырылды.

Изилдөө республикадагы 79 жогорку окуу жайын камтыды. Жалпы рейтингде ЖАМУ 11-орунду ээлеп, 2024-жылга салыштырмалуу бир позицияга көтөрүлдү. Ал эми өлкөнүн 14 алдыңкы ЖОЖун камтыган кесиптик рейтингде университет 12-орундан 9-орунга көтөрүлдү.

Жолугушууда университеттин бир катар багыттар боюнча оң динамикасы белгиленди. 2025-жыл үчүн Scopus эл аралык базасындагы публикациялардын окутуучуга туура келген саны боюнча ЖАМУ өлкөдөгү бардык ЖОЖдор арасында 3-орунду ээледи. Акыркы үч жылдагы публикациялык активдүүлүк эске алынган кесиптик рейтингде университет 9-орунда болуп, 76 макала жарыяланган, алардын бешөө биринчи квартильге (Q1) кирген журналдарда 2025-жылы жарык көргөн. Ошондой эле профессордук-окутуучулук курамдын сапаты боюнча көрсөткүч 12-орундан 3-орунга көтөрүлгөнү белгиленди.

Студенттердин жогорку канааттануусу да белгиленди: көз карандысыз сурамжылоонун жыйынтыгы боюнча ЖАМУ республикада 5-орунду ээледи, ал эми сурамжылоого катышкан студенттердин 93,3%ы кайрадан өз университетин жана адистигин тандай турганын билдиришкен.

Ректор К.Ж. Усенов EdNet агенттигинин баалоосу үчүн ыраазычылык билдирип, университет иш берүүчүлөр менен кызматташууну бекемдөө, эл аралык байланыштарды кеңейтүү жана санариптик инфраструктураны өнүктүрүү багытында ишти улантарын белгиледи.