Теориядан практикага: ЖАМУ Erasmus+ SILKWAY алкагында Германиядан заманбап энергетикалык жабдууларды алды

Б.Осмонов атындагы Жалал-Абад мамлекеттик университети (ЖАМУ) туруктуу энергетика жана инновациялык билим берүү тармагындагы потенциалды өнүктүрүүгө багытталган Erasmus+ SILKWAY-EU (№101179683) эл аралык долбоорун активдүү ишке ашырууну улантууда.

Долбоордун алкагында университет тарабынан Германиядан жалпы суммасы 40 998,68 евро болгон заманбап окуу-лабораториялык жабдуулар сатып алынды. Жабдуулар университетке ийгиликтүү жеткирилди жана учурда аларды ачуу  жана колдонууга даярдоо иштери жүргүзүлүүдө.

Сатып алынган комплекстер leXsolar компаниясынын жогорку технологиялуу окуу чечимдери болуп саналат жана алар Европанын алдыңкы университеттеринде кайра жаралуучу энергия булактары жана энергияны үнөмдөө тармагында практикалык окутууда кеңири колдонулат.

Жабдуулардын тизмеси төмөнкүлөрдү камтыйт:

1.      leXsolar-Emobility Professional — электр мобилдүүлүк боюнча окуу комплекси

2.      leXsolar-SmartGrid Professional — акылдуу электр тармактарын моделдөө системасы

3.      leXsolar-Hydropower Ready-to-go — гидроэнергетиканы үйрөнүүгө арналган жабдуулар

4.      leXsolar-ThermalEnergy Professional — жылуулук энергетикасы боюнча чечимдер

5.      leXsolar-NewEnergy Ready-to-go — кайра жаралуучу энергия булактары боюнча комплекс

6.      leXsolar-BioEnergy Ready-to-go — биоэнергетика боюнча окуу жабдуулары

7.      leXsolar-Esave Ready-to-go 2.0 — энергияны үнөмдөө боюнча чечимдер

Бул жабдуулар билим берүү процессинин сапатын жогорулатууга, практикага багытталган окутууну киргизүүгө жана студенттердин туруктуу энергетика тармагындагы заманбап компетенцияларын өнүктүрүүгө олуттуу салым кошот.

SILKWAY долбоору Европа жана Борбордук Азия өлкөлөрүнүн өнөктөштөрү менен кызматташтыкта ишке ашырылып, энергетика жана туруктуу өнүгүү тармагындагы глобалдык чакырыктарга жооп бере алган жаңы муундагы адистерди даярдоого багытталган.