ЖАМУнун SILKWAY долбоорунун эл аралык өнөктөштөрүнүн Ташкенттеги жолугушуусуна катышуусу

2025-жылдын 26–28-ноябрында Б. Осмонов атындагы Жалал-Абад мамлекеттик университетинин өкүлдөрү эл аралык SILKWAY — «Кайра жаралуучу энергия булактарынан электр жана жылуулук энергиясын өндүрүү үчүн дисциплиналар аралык жана туруктуу көндүмдөрдү өнүктүрүү» долбоорунун алкагында И. Каримов атындагы Ташкент мамлекеттик техникалык университетине иш сапары менен барышты.

Долбоор Европа Биримдигинин Erasmus+ программасынын алкагында ишке ашырылып, Кыргыз Республикасы менен Өзбекстан Республикасында жогорку билим берүүнүн потенциалын өнүктүрүүгө багытталган. Бул демилге Европа Биримдигинин «Жашыл курсу» стратегиясынын максаттарына шайкеш келип, региондун энергетикалык жана геосаясий туруктуулугуна байланышкан заманбап чакырыктарга жооп берет.

SILKWAY долбоорунун негизги максаты — кайра жаралуучу энергетика, энергияны үнөмдөө, айланма экономика жана бизнес-өнүктүрүү тармактарында жаңыланган билим берүү программаларын киргизүү аркылуу адистерди даярдоонун сапатын жогорулатуу жана бүтүрүүчүлөрдүн ишке орношуу мүмкүнчүлүктөрүн кеңейтүү болуп саналат.

Иш сапардын жүрүшүндө долбоордун негизги багыттары талкууланды, анын ичинде Европалык жогорку билим берүү мейкиндигинин (EHEA) стандарттарына ылайык окуу курстарын иштеп чыгуу, окутуучуларды инновациялык окутуу ыкмалары боюнча даярдоо, заманбап окуу лабораторияларын түзүү жана университеттер менен энергетика тармагынын ортосундагы кызматташтыкты кеңейтүү маселелери каралды.

Иш-чарага долбоордун бардык өнөктөштөрү, анын ичинде европалык университеттердин өкүлдөрү жана консорциумдун координаторлору катышты. Жолугушуулардын жыйынтыгында долбоорду ишке ашыруунун кийинки кадамдары, тажрыйба алмашуу жана академиялык жана илимий кызматташтыкты бекемдөө боюнча макулдашууларга жетишилди.