Студенттер жакшылык иштеринде

        Жалал-Абад мамлекеттик университетинин Б. Осмонов атындагы экономика-юридикалык колледжинин ФК-3-23 тайпасынын студенттери кайрымдуулук иштери менен активдүү алектенишет. Алар социалдык маанилүү долбоорлорго демилге көтөрүп, кайрымдуулук иш-чараларына жигердүү катышышат. Алардын волонтёрлук ишмердүүлүгүнүн негизги багыттарынын бири — «Элим Барсынбы» кайрымдуулук фонду менен кызматташуу.

        «Элим Барсынбы» фонду муктаж үй-бүлөлөргө, жетим балдарга, улгайган адамдарга жана мүмкүнчүлүгү чектелген жарандарга жардам көрсөтөт.

       Волонтёрлук ишмердүүлүктүн алкагында студенттер гуманитардык жардам чогултууга жана таратууга, кайрымдуулук акцияларын жана иш-чараларын уюштурууга катышып, социалдык маселелер боюнча маалымдуулукту жогорулатуу максатында ар кандай түшүндүрүү иштерин  өткөрүшөт.

       Мындан тышкары, студенттер муктаж адамдарга жардам көрсөтүү менен катар жоопкерчилик, боорукердик жана дүйнөнү жакшы жакка өзгөртүү каалоосу сыяктуу маанилүү сапаттарды өздөрүндө өрчүтүшөт. Балдардын үлгүлүү иштери замандаштарын жакшылык кылууга шыктандырып, жаш муун коомго олуттуу таасир тийгизет.

       Студенттердин кайрымдуулук ишмердүүлүгү — бул боорукердик менен өз ара жардамдашуу маданиятын өнүктүрүүгө кошкон салымы болуп, адилеттүү жана гармониялуу коомду түзүүдө чоң мааниге ээ.